Op 'e strún

Skoallen kinne derfoar kieze om Frysk en meartaligens oan te bieden yn trije projekten ferspraat oer it skoaljier: de TT – De Trije Topprojekten. De earste twa projekten, Berneboekewike yn oktober en Poëzijwike yn febrewaris, hawwe itselde tema as de lanlike tema’s. Fryske boeken en gedichten foarmje de basis om op in kreative, ynspirearjende en meartalige wize mei Fryske en streektalen oan de slach te gean. It lêste projekt fan de TT is erfgoed, wêryn’t it Fryske erfgoed sintraal stiet.

Yn 2024 stie it tema Op ‘e strún sintraal. De wike begjint mei it finen fan in skatkaart op it skoalplein, bygelyks yn de sânbak, yn de strúken of op in oar plakje. Der is in skatkaart foar de boppebou (groep 5/8) en in skatkaart foar de ûnderbou (groep 1/4).

Op de skatkaart foar de groepen 5/8 stean trije strúnkaarten. Mei dy strúnkaart yn de hân ûndersykje de bern yn groepkes de omjouwing: de strjitnammen, de huzen, gebouwen en … wat binne de grutte fiif? Neidat se op de strún west ha gean se fragen betinken, antwurden op de fragen sykjen en oan it ein fan de wike presentearje se harren ûndersyk. Dat lêste kin yn de foarm fan in toanielstik, in ferske of in oare kreative presintaasje.

De skatkaart foar de groepen 1/4 is een BINGO-skatkaart. Op dizze kaart stean foto’s fan û.o. gebouwen, strjitten, beammen. Kinne de bern tidens de strúntocht dizze foto’s yn de omjouwing werom fine? Nei de strúntocht feroaret de klasse yn in erfgoedlokaal. Sa feroaret de boartershoek yn in Erfgoedmuseum en hingje yn de bouhoeke foto’s fan gebouwen út de omjouwing dy’t de bern neibouwe kinne.

Hjirûnder fynst alle materialen om de erfgoedwike in sukses te meitsjen.